لانهاء الجدل| اراجع القديم ولا اذاكر الجديد ؟

 كتب : تُقى عاشور 

عشان نجاوب على السؤال ده , فالحقيقة الموضوع متوقف على اكتر من عامل عشان نوصل لاجابة نموذجية.

القاعدة غير قابلة للتعميم تماما.. لذلك تعالى سوا نفسر الموضوع ونفصله.. ونجاوب فى النهاية

اولا الموضوع متوقف على :

- الكلية اللى انت فيها والمادة اللى بتدرسها

- شكل الامتحان (هل هو mcq ولا كتابة ولا complete ولا short notes ؟)

- الكمية اللى انت مذاكرها قبل كده 

- نسبة تذكرك للى مذاكره قبل كده قد ايه 

- طبيعة دكتور المادة او واضع الامتحان ( وده ممكن تعرفه بسؤال الدفعات اللى اكبر منك)

- هل المادة مترابطة مع بعض ولا لا 

- هل فى تكرار فى المادة نفسها ولا لا ؟

لاحظت ان كل العوامل انت وحدك اللى تعرفها وتقدر انت اللى تحدد على اساسها ؟

خلينا ناخد عامل عامل ونفسر على اساسه..

طبيعة الكلية : لا شك انك لو فى كلية عملية او طبية يفضل اكيد مذاكرة الجديدة (مع قراءة القديم) مش شرط تراجع القديم مراجعة صارمة فى الوقت ده ولكن لازم تكون ملم بكل المعلومات اللى بتعدى عليك كل سنة وده لان الكليات دى السنين فيها معتمدة ومترتبة على بعض , يعنى لو فى مهارة ماكتسبتهاش فى سنة اولى مثلا او مادة ماذاكرتهاش كويس فى سنة تانية وبقيت فى سنة رابعة بكل تأكيد هيحصل معاك عجز بسبب الجزء اللى اهملته. ولكن برده ارجع واقول خليك ذكى واسأل كتير عن كليتك وطبيعة عملك بعد التخرج عشان ماتخسرش حاجة.

شكل الامتحان : 

لو الامتحان mcq فبكل تأكيد طبعا لازم تذاكر الجديد.. لان الاختيارات اغلبها خداعة , ممكن تكون مذاكر كويس جدا وتغلط برده.. لذلك فالحل الاسلم هى انك تذاكر الجديد حتى لو نسبة تحصيلك فى الجديد والقديم 50% على الاقل تقدر تاخد بالشبه وتحل ماتبقاش معتمد على الحظ بشكل كبير لو انت ماذاكرتش الجزء الجديد خالص وبالتالى فى اسئلة 80% هتحلها غلط.

لو الامتحان كتابة فده هيخلينا نرجع لنقطتين مهمين : ايه طبيعة واضع الامتحان ؟ وايه الكمية اللى انت لسه ماذاكرتهاش؟

لو واضع الامتحان طبيعته انه بيجيب اسئلة عليها درجات كبيرة, ف فى الحالة دى هتحتاج انك تذاكر الجديد وتقرا القديم او ماتقراهوش خالص وتعتمد على مذاكرتك القديمة , وده الحل الامثل عشان ماتضيعش منك درجات كتير.

الكمية اللى انت ماذاكرتهاش : لو الامتحان كتابة والكمية اللى انت مش مذاكرها اقل من ربع المنهج فيستحسن فى الحالة دى انك تكتفى بمراجعة القديم فقط مع قراية الجديد (لو اتاحلك الوقت ده) .. اما لو كانت الكمية كبيرة يعنى اكتر من ربع المنهج او نصه ف فى الحالة دى لازم برده تراجع القديم + تذاكر ولو حتى ربع المنهج من النص اللى انت سايبه وبكده هتطلع بأقل الخسائر.

لو الامتحان complete : ده هيرجع زى النقطة اللى فاتت بالظبط من ناحية الكمية اللى انت مش مذاكرها وهتتعامل على اساسها.

لو الامتحان short notes : برده هيرجع للكمية اللى انت مذاكرها, ولكن يفضل فى الحالة دى انك تراجع اللى انت مذاكره كويس جدا لان حتى لو جالك اسئلة على الجزء اللى انت مش مذاكره فهيكون درجاتها قليلة.

الكمية اللى انت مذاكرها :

مش محتاج اقولك لو مذاكر كمية قليلة يبقى لازم تذاكر كمية زيادة عليها بعدين تفكر فى المراجعة والاولوية هنا لمذاكرة الجديد والعكس صحيح.

نسبة تذكرك :

طبعا لو كنت بتقرا القديم ومش فاكر فيه حاجة او متذكر بنسبة 30% فيما اقل ف فى الوقت ده الاولوية لمراجعة القديم ولا يسمح تماما بانك تذاكر جديد فى اللحظة دى والعكس صحيح.

طبيعة دكتور المادة (واضع الامتجان) :

وده عامل مهم.. هل واضع الامتحان بيركز على اجزاء معينة ؟ هل الاجزاء دى ثابتة بيسأل فيها كل سنة ولا لا ؟ 

لو بيركز على اجزاء معينة فى الامتحان وكل سنة الاجزاء متغيرة فلازم فى الوقت ده تغطى اكبر قدر من المنهج عشان ماتفقدش درجات كتير.

اما لو الاجزاء ثابتة ف انت عارف هتعمل ايه.

ترابط المادة :

المادة لو مترابطة ببعض يعنى ممكن سؤال ييجى فى الباب الرابع مثلا بالاشتراك مع الباب التانى مع ان ظاهرهم انهم ابواب مختلفة عن بعض فلازم فى الوقت ده تذاكر الابواب او الاجزاء المترابطة ببعض.

اما لو المادة مترابطة بحيث انها متربتة على بعض والاجزاء نوعا ما شبيهة لبعض , ف فى الوقت ده تقدر تكتفى بالجزء اللى انت مذاكره وتذاكره كويس وتقدر تحل فى الجزء اللى انت ماذاكرتهوش بطريقة الاستنتاج.

تكرار المادة :

نقول مثال مثلا من كليات الطب : وارد تلاقى فى محاضرات الفسيولوجى مثلا بيتكلم عن مرض معين والمرض متكرر فى البايوكيمسترى او الباثولوجى او الاناتومى , ف فى الحالة دى هتذاكر المادة الاشمل والاعم للمرض ده (واللى غالبا هتكون الفسيولوجى) وتحل الباقى بالاستنتاج. كذلك برده الاستنتاج ممكن بين الهستولوجى والباثولوجى لأن كلاهما يختص بدراسة الخلايا.


واخيرا دلوقتى تقدر تحط كل العوامل دى قدامك وتحسب على اساسها هل يا ترى هتذاكر الجديد ولا تراجع القديم ؟


للمزيد انضم الى جروبنا 1Date Challenge

لا تنسى الأشتراك في قناة التيليجرام الخاصة بنا لتصلك كل الفرص

تعليقات

المشاركات الشائعة من هذه المدونة

كيفية الحصول على الدعم المالي من كورسيرا

أهم الكورسات لتعلم مجال تحليل البيانات data analysis

فقه النفس | د.عبد الرحمن ذاكر الهاشمى.