الدليل الشامل لكتابة محتوى | مبادرة تثقيف

أنا عارف إنك مشتت، لسة مش عارف انت هتعمل إيه بالظبط، عشان كدة عملنالك المقال دا مخصوص ليك بالعامية، عشان يكون كل حاجة بسيطة وواضحة. 


إزاي تكتب محتوى خطوة بخطوة؟

كتابة المحتوى جزء من عملية كبيرة حبتين وهي "التسويق بالمحتوى": 

وهي طريقة للتسويق، بكلم فيها جمهور معين، وأكتبله محتوى، بمختلف أنواعه، عشان أحقق أهداف البيزنس، وكمان أعمل صلة قوية بيني وبين الجمهور.


وعشان تكتب قكعة محتوى تجذب الجمهور، وتفيده، لازم نبص لقطعة المحتوى من ٣ اتجاهات:

١. الموضوعات (ازاي اختار المواضيع اللي هكتب عنها)

٢. الاسلوب (تركات تخلي محتواك مؤثر وقوي)

٣. التنسيق (شكل المحتوى بتاعي)


فتعالى نلبس النضارة ونبص على المحتوى من كل اتجاه:


الموضوعات

وهي دي اللي غطيناها في مرحلة ما قبل الكتابة، أي موضوع تكتب عنه لازم يكون ليه علاقة بجمهورك، أو بيميزك عن منافسينك، الأفكار والمواضيع بتاعتك.


وعشان تختار موضوعك بشكل سليم بتقعد تسأل أسئلة وجودية كدة. 

  • زي أنا بكتب ليه؟
  • أنا بكتب لمين؟ 
  • ايه أنواع المحتوى؟
  • مين المنافسين بتوعي؟
  • هكتب عن إيه؟


ودي المرحلة اللي قبل ما تحط حرف في الورقة أو تكتب كونتنت، وتعالى نراجع إزاي تجاوب كل سؤال من دول.


1. حدد الهدف من الكتابة. 


أنا مينفعش أكتب بدون ما أكون حاطة هدف في دماغي عايزة أوصله، تحديد الهدف بيفرق معايا عشان أعرف أنا ماشي إزاي، عشان أعرف أنا بقرب منه ولا لسة بعيد. 


الهدف هو اللي على أساسه بحدد المحتوى بتاعي نجح ولا لأ. 


والهدف ليه 5 صفات متجمعين في SMART

1. Specific محدد

2. Measurable قابل للقياس

3. Attainable قابل للتحقيق

4. Relevant ليه علاقة بالهدف الأكبر

5. Time bound ليه ديدلاين


مثال:

أنا عايز أزود متابعيني على السوشيال ميديا

أنا هجيب ٥٠٠ لايك للبيدج الشهر دا


2. العميل buyer persona

1. السن

2. الدخل

3. اهتماماته

4. مشاكله

5. اسئلته

كل نقطة من دول هي كنز أقدر أستغله في المحتوى بتاعي، أقدر أفهم إزاي هأثر فيه، إزاي احل مشاكله، إزاي أعمل علاقة بيني وبينه. 


كل معلومة تقدر تعرفها عن الbuyer persona استغلها في محتواك. 


3. أنواع المحتوى. 

يا ترى هكتب المحتوى دا في شكل إيه (مكتوب ولا مسموع ولا مرئي). 


لو كان مكتوب: بوست، مقال.

مسموع: زي البودكاست.

مرئي: زي الصور والفيديوهات والانفوجرافيك. 


4. اعرف منافسينك يحتار عدوك فيك. 


اعرف الناس اللي بتكتب في نفس مجالك، ايه انواع المحتوى اللي بيكتبوه؟ ايه الاقكار اللي بيكتبوا عنها؟ ايه ناقصهم؟ ايه عيوبهم؟ ايه اسلوبهم في الكتابة؟ 


كل دا يخليني أفهم نقاط قوتهم واللي بيخلي الجمهور ينجذب ليهم، ونقاط ضعفهم اللي أقدر أنا أستغلها كويس وأكتب عنها في المحتوى بتاعي. 


5. الأفكار 

٣ حاجات لو بتعملهم عمرك ماهيكون عندك أفكار:

١. بتكتب قبل الديدلاين على طول

٢. بتقول لنفسك كلام سلبي وبتحطم من نفسك

٣. دايما خايف من النقد


ودول ال ٥ نصايح تكسر بيهم أي حاجز لأفكارك.


١. القراءة للكاتب نجاة


القراية بشكل مستمر جزء لا يتجزأ من مهاراتك، واللي بتغذي عقلك بكل جديد، وتخلي عندك القدرة تفكر برة الصندوق، كمان هتساعدك تحسن من أسلوبك.



٢. العصف ذهني


العصف الذهني لربع ساعة هيخرجلك كم مهول من الأفكار بس المهم تقدر تعمله صح

ودي بعض النصايح عشان تعمل عصف ذهني:

١. ابعد عن الموبايل، وأي حاجة بتشتتك

٢.أكتب أي فكرة بتجيلك مهما بانت تافهة

٣. ما تنقدش ولا تقيم ولا تتريق على أي فكرة هتتقال



بعد ما تخلص خد الأفكار دي وحاول تختار أفضلها، او حاول تدمج أكتر من فكرة مع بعض عشا تبقى في أحسن شكل. 



٣. افصل وانزل اتمشى


لو فصلت عن التفكير .. هيفرق معاك جدا.

الوقت اللي هتفصل فيه عقلك اللاواعي ممكن يشتغل ويبهرك بأفكاره. 



٤. أكتب أفكارك


الفكرة اللي مابتتكتبش في وقتها بتتنسي وتطير، حاول دايما يكون معاك ورقة وقلم، او استخدم النوت اللي عندك على الموبايل .. المهم يكون عندك ملجأ تخزن فيه أفكارك. 



٥. أعمل خريطة ذهنية


هات ورقة فاضية واكتب الموضوع الاساسي بتاعك في النص وابدأ قسمه لأجزاء صغيرة تقدر تتكلم عنها

وبعدها أجزاء اصغر وأصغر لحد ما تغطي كل التفاصيل. 


وخد كل جزئية واعمل منها فكرة للمحتوى .. او ادمجهم مع بعض


كدة خلصنا الخطوات اللي لازم تعملها قبل ما تكتب، خد نفسك كدة وركز في اللي جاي عشان هو ده الأهم. 



النظرة التانية للمحتوى: وهي الأسلوب 

وهي دي اللي إنت أخدت فيها تركات لكتابة أجزاء المحتوى. مستعد نبدا نراجع على التركات؟


6. الكتابة

أي محتوى في الدنيا ليه ٥ أجزاء رئيسين 

(عنوان، مقدمة، جسم المحتوى، cta)


١. العنوان 

عشان تظبط العنوان بنستخدم 4U's

  • Useful
  • Urgent
  • Unique
  • Ultra specific


يعني يكون محدد، وواضح، في كلمات متفردة، تستعحل القاريء إنه يقرأ قبل ما حاجة تحصل، العنوان يحسسه انه الموعيد مفيد. 


كمان ممكن تستخدم صيغ عناوين مشهورة زي 

١. كيف - كيفية - ازاي = ازاي تتعلم كتابة المحتوى من الألف للياء


٢. دليل 

دليلك لتعلم كتابة المحتوى خطوة بخطوة


٣. افضل - أهم - اقوى 

أفضل كورس لكتابة المحتوى بالعامية


٤. أسرار - سر

اسرار المحتوى التسويقي | ما يخفيه عنك المحترفون


اما لو بتكتب عنوان غلى بوست في السوشيال ميديا 

فيفضل يكون عنوان كريتيڤ، وفكرته حلوة

مثلا:

كتابة المحتوى زي ما بيقول الكتاب

رحلتي من بتاع بوستات لكونتنت رايتر

خلطة المحتوى السرية 


٢. المقدمة

تاني حاجة تشد بيها عميلك بعد العنوان.

النجاح الحقيقي إنك تحسسه بالمقدمة دي انه محتاجها، أو هتحل مشكلته، أو هتخلي حياته احسن، أو هيندم لو مقرأهاش. 


الشاطر اللي فاهم جمهوره هو بس اللي هيعرف يشده.


خليك شاطر وذاكر ال (buyer persona) بتاعك كويس عشان هو ده مفتاح نجاحك في كتابة المحتوى. 


٣. جسم المحتوى


وعد الحر دين عليه 

انت جذبت القاريء في العنوان وجذبته في المقدمة .. والقاريء مستني منك قيمة، مستني منك حاجات أنت وعدت إنها هتحصله. 


جسم المحتوى هو اللي هيبني ثقة بينك وبين عميلك، هو اللي هيخليه يقرألك تاني وتالت ورابع، وهو مصدق إن إنت فعلا هتقدمله قيمة.


خير الكلام ما قل ودل، بلاش حشو الكلام، كل كلمة بتكتبها لازم يبقى ليها حسابها ووزنها وتأثيرها على القاريء. 


المحتوى مابيتقاسش بالطول .. فحاول دايما تستغنى عن أي كلمات مابتضفش قيمة، واستبدلها بكلمات وتعبيرات أقوى. 


٤. الخاتمة


أكد على المعلومات المهمة، الرسالة اللي عايز توصلها، لخص اللي كتبته، قول نصيحة .. بس أهم حاجة دا مش مكان الكلام الكتير، لو عايز تحكي كتير عندك جسم المحتوى عبر فيه براحتك، لكن خلي الخاتمة تظبط الدنيا.


٥. الCTA


الجمهور دايما بيحتاج حد يوجهه، يطلب منه طلب صريح ينفذه.

اطلب .. اتصل .. اعمل لايك .. شير


كل دي من أمثلة الCTA أختار منها اللي يناسبك.


ودلوقت ألبس النضارة التالتة للمحتوى وهي: التنسيق


ازاي تكتب محتوى يريح عين جمهورك؟ 


العين أول حاجة بتحكم. لو شكل المقال أو البوست معجبنيش مش هقرأه، وعشان ماتضيعش مجهودك في الأفكار والمواضيع وتلاقي التنسيق قتل كل حاجة.. امشي على النصايح دي:


١. المقدمة تكون صغيرة مش طويلة. 

٢. سيب مسافة بين الفقرة واللي بعدها، وبين العناوين والفقرات. 

٣. استخدم علامات الترقيم


ودي شوية معلومات مهمة لازم تكون عارفها عن علامات الترقيم:

علامات الترقيم عاملة زي المكسرات اللى ممكن نحطها على الأكل، بتدي شكل جمالي للمحتوى بتاعك أيا كان، غير إنها بتريح عين اللي بيقرأ جدا، مثلا: لما تحط نقطة فهنا انت بتقوله: خد نفس اقف هنا، فميحسش إنه بيجري وهو بيقرأ ويكمل. 


أهم علامات الترقيم اللي تاخد بالك منها: 


١. النقطة (.): ودى بتدل إنك بتنهي الفقرة أو الكلام (بتقوله اقف هنا). 


٢. الفاصلة (،) : ودي بتكون في وسط الجمل اللى بينها ترابط معين أو بعد النداء، بتنظم شكل الكلام وبرده بتدي مساحة للقارئ إنه يقف عندها. 

مهم أوي تاخد بالك إن الفاصلة مفيش قبلها مسافة، لكن بعدها بنسيب مسافة حرف زي ما أنا عاملة كده بالظبط. 


٣. الفاصلة المنقوطة (؛): ودي دايما بتيجي لما تذكر سبب أو تعليل لكلامك.

مثال: أحمد طلع الأول على دفعته؛ لأنه يذاكر بجد. 


٤. النقطتان (:): ودي بعنوان العناوين الفرعية أو إنك قولت كلمة عامة وهتقول تفاصيلها أو أجزاءها بعدها. 


٥. علامات التنصيص (" "): الشائع إنها بتستخدم لما تكتب اقتباس معين وممكن تستخدمها عشان تعمل تركيز على كلمة معينة. 


٦. علامة التعجب (!): من اسمها واضحة.


٧. علامة الاستفهام (؟): أكيد في سؤال أو جملة استنكارية. 


٨. الشرطتان (- -): ودول دايما بنحطهم قبل وبعد الجملة الاعتراضية. 

جملة اعتراضية زي: محمد -صلى الله عليه وسلم- 


٩. علامة الحذف (...): وهنا معناها إن في تكملة لكلامك (زي: ... الخ) 


١٠. الشرطة (-): ودى دايما بعد الأرقام زي ١- وممكن بعد أولًا وثانيًا. 


وبس كدة إنت كتبت محتوى قوي ومؤثر في كل تفاصيله لإنك

١. راعيت اختيار الموضوع

٢. التنسيق وشكل المحتوى

٣. أسلوب الكتابة

 

كدة خلصنا أطول خطوة في تاريخ الكونتنت، تقدر ترتاح شوية عشان نكمل، لو عايز ترمي مجهودك كله على الأرض .. انشر المحتوى دلوقت. 

لكن لو عايز توصل لأفضل محتوى يبقى ركز معايا في اللي جاي. 


الحلو في أحلى منه، وعشان تطلع أحلى حاجة في محتواك لازم تراجع وتعدل، وتعدل، وتعدل، وتعدل، ودي هي الخطوة السابعة.


7. التعديل 


على المحتوى مرحلة أساسية مش للترفيه، وانت بتعدل هتلاقي كلمات مكررة تشيلها، فكرة مش في مكانها ترتبها وتحطها في مكانها الصح، هتعدل الأخطاء الإملائية بتاعتك. 


ودي سوبة اسئلة تساعدك في خطوة التعديل.

  • هل المحتوى بتاعي الجمهور مهتم بيه؟
  • هل اسلوبي الجمهور هيحب يقراه؟
  • هل الأفكار مترتبة بتسلسل؟


حط نفسك مكان جمهورك واقرأ المحتوى بصوت عالي وشوف هل انت مستمتع وانت بتقرأه ولا حاسس انه شوية معلومات جمب بعض. 


8. أنشر المحتوى. 

كدة أخيرًا خلصت رحلتك مع قطعة المحتوى بتاعك.


طب لو إنت مسؤول عن بيدج كاملة؟ 


فاكر أول ٥ خطوات هم دول الخطوط العريضة اللي بتمشي على أساسهم وتختار الأفكار الكتير والمواضيع اللي هتكتب عنها في البيدج، وترتبهم، وتمشي باقي الخطوات الكتابة من (عنوان، مقدمة،.....) لحد التعديل. وبس كدة


طب لو إنت هتشتغل فريلانسر؟

 

وقتها هتتعامل مع عملاء مختلفين، فلازم تخلي العميل يجاوبك على ٦ أسئلة مهمين عشان ماتحصلش مشاكل وتقدر تكتب محتوى مؤثر وفي نفس الوقت يحقق هدف العميل. 


الأسئلة دي بنسميها  البريف brief وهم:


١. ايه هو المنتج؟ 

٢. ايه مميزاته وعيوبه وميزته التنافسية؟ (افتكر اللي أخدته في الماركتنج)

٣. المنتج بيحل مشكلة إيه؟

٤. ايه الهدف بتاعك من المحتوى؟ ( عايزني اسوق للمنتج، ولا أضيف قيمة للجمهور)

٥. مين هم الجمهور بتاعك؟

٦. مين أقوى ٣ منافسين ليك؟


لو فاكرني خلصت كلامي فأنا لسة عايزة أفيدك أكتر، وهقولك إزاي تقدر تكمل بعد الكورس دا، ودول اعتبرهم تاسكات مدى الحياة.


١. أكتب 


أكتب كل يوم .. 

أكتب كل يوم .. 

أكتب كل يوم .. 

أكتب كل يوم .. 


اكتب عن معلومة استفدتها، كتاب قرأته، عن عادة بتعملها، عن حاحة بتحبها. 

دي أفضل طريقة لتحسين الكتابة. 



٢. نوع مصادرك


ماتعتمدش على موقع واحد أو مصدر واحد في الكتابة، دايما قبل ما تكتب تبحث عن المعلومة في مصادر مختلفة عشان ماتكررش محتوى غيرك. 



٣. حلل الاعلانات


أي محتوى (( يشدك )) وانت فاتح الفيس، حلله واعرف هو ليه شدك، ايه اللي بيميزه، طب كتب العنوان إزاي

التغذية الفكرية هي طريق مضمونة عشان تحسن أسلوبك.


الإنسان بيتعلم بالمحاكاة والتقليد ..

من أول وإنت صغير بتخاول تمشي وتاخد خطوة لحد دلوقت، دي طبيعة فيك، شوف الشاكرين في المجال بيكتبوا إزاي وأفهم أسلوبهم. 

ومن دا كله هتطلع بأسلوبك الخاص.


لو عندك أي سؤال ماتترددش إنك تسألني.

تعليقات

  1. عظيم جدا جدا جدا ❤️❤️❤️

    ردحذف
  2. بجد يعني ربنا يكرمكم كلكم ويبارك فيكم جميعا وعلى كل القائمين على المبادرة 🤗🤗🤗

    ردحذف
  3. مقال اكثر من رائع بجد وتجميع هايل لكل معلومه اتقالت ربنا يكرمكم ❤❤❤

    ردحذف
  4. مقال عظيم ومبدع بجد
    بجد شكرا ليكم وربنا يجازيكم كل خير وينفع بيكم ويزيدكم من فضله.

    ردحذف
  5. حلو جدا جزاكم الله خيرا 🔥🔥

    ردحذف
  6. يا جماعه فين لينك التاسك

    ردحذف

إرسال تعليق

المشاركات الشائعة من هذه المدونة

تعلم التسويق مع مبادرة تثقيف 2 | التاسكات

كورس تعلم التسويق من مبادرة تثقيف | الفيديو الأول